ग्रामपंचायत शिंदेवाडी, ता करवीर येथील काळम्मादेवी मंदिरामध्ये दर वर्षी अश्विन महिन्यात यात्रेसाठी हजारो भाविक येतात. या यात्रेस शंभर वर्षांची परंपरा आहे.कोल्हापूर गगनबावडा महामार्गावर करवीर तालुक्याच्या पश्चिम परिसरात भोगावती नदीच्या काठावर वसवलेले शिंदेवाडी व विशाल तीर्थक्षेत्रानंतर होणारी मोठी यात्रा म्हणून शिंदेवाडी येथील काळम्मादेवी यात्रेचा उल्लेख केला जातो. तेथील ग्रामदैवत काळम्मादेवी आहे. गावच्या मध्यभागी काळम्मादेवी देवाचे सुमारे १५० वर्षापूर्वीचे मंदिर आहे.

खुपिरे पैकी शिंदेवाडी या गावातील काळंमा ही ग्रामदेवता म्हणजे कालीच्या प्राचीन उपासनेचे प्रतीक आहे.वास्तविक कालीची उपासना उग्र देवता या स्वरूपात प्रचलित असली तरी इथे ती गावाच्या रक्षणाचा वसा घेतलेली जगन्माता आहे.तिच्या हातातील आयुधावरून हे स्पष्ट होते.शारदीय व चैत्री नवरात्र हे देवीचे दोन वार्षिक उत्सव साजरे करण्याची गावाची परंपरा आहे.

काळमादेवीचे हजारो भक्त पंचक्रोशीत असल्यामुळे देवीच्या उत्सवाला खूपच मोठा प्रतिसाद मिळतो.संपूर्ण करवीर क्षेत्राचा पौराणिक इतिहास सांगणारा करवीर माहात्म्यम् या ग्रंथाचे उत्सवाच्या वेळी पारायण व निरूपण केले जाते.गांव आणि आसपासच्या परिसरातील सर्व लोकांना सात्त्विक मार्ग दाखवणारे उत्सव ग्रामस्थ मोठ्या श्रद्धेने साजरे करतात.

धार्मिक प्रवृत्तीचे वातावरण गावात देवीच्या श्रद्धेमुळेच निर्माण झाले. व देवीवर पूर्ण विश्वास ठेवला तर आयुष्यात काहीच कमी पडत नाही.सर्व प्रकारच्या संकटात देवी आपल्या पाठीशी आहे अशी ग्रामस्थांची श्रद्धा असल्यामुळे संपूर्ण गांवात एकोपा आणि शांतता नांदते आहे.

वारकरी संप्रदायाचे आराध्यदैवत विठ्ठल रखुमाई व गणपती यांच्या मूर्तीपण याच मंदिरात स्थापन केलेल्या आहेत.त्यांचे उत्सवसुद्धा नियमितपणे मोठ्या उत्साहात पार पाडले जातात.

व्यसनमुक्त व तंटामुक्त गांव अशी गावाची ओळख या ग्रामदेवतांमुळे व त्यांच्या उत्सवामुळेच निर्माण झाली आहे.धार्मिक संस्काराचा वारसा पुढील पिढीला मार्गदर्शक ठरत आहे.

             देवाचे मंदिर जुने व छोटे असले तरी देवाची कीर्ती पंचक्रोशीत पसरलेली असल्याने खुपिरे,साबळेवाडी, बालिंगा, नागदेवाडी, वाकरे, कुडित्रे, कोपर्डे, दोनवडे, यवलूज, वरणगे पाडळी येथील

sभाविक मोठ्या प्रमाणात दर्शनासाठी येत असतात. अनेक भाविक अन्नधान्य दान करतात. त्यातून सुमारे तीन ते चार क्विंटल गव्हाची खीर प्रसाद म्हणून वाटली जाते. मुख्य यात्रेचा आठवडा शाकाहारी आठवडा म्हणून पाळला जातो. शेवटच्या दिवशी मंदिर समितीतर्फे महाप्रसादाचे वाटप केले जाते.

             तसेच प्रत्येक मंगळवारी व हरीनाम सप्ताहास पंचक्रोशीतील भाविकांची गर्दी असते. त्यावेळी देखील मंदिर समिती मार्फत महाप्रसादाचे आयोजन केले जाते. अशा प्रकारे दीडशे वर्षांची परंपरा असणारे काळमादेवी मंदिर आहे.